Müqəddəs Ramazan ayı münasibətilə “Aztəsərrüfat “ MMC və “Yolüstü YRM” MMC-nin birgə təşkilatçılığı ilə iftar süfrəsi təşkil edilib. Tədbirdə Aqroparkın işçiləri, Yolüstü restoranının əməkdaşları iştirak ediblər. İftar süfrəsinə 60-dan çox ailə qatılıb.
İftar süfrəsində çıxış edən “Aztəsərrüfat “ MMC-nin rəhbəri Aydın Dəmirov, Ramazan ayının fəzilətlərindən danışaraq, bu ayın insanları bir araya gətirən, paylaşmağı və xeyirxahlığı təşviq edən müqəddəs bir dövr olduğunu vurğulayıb. O, tədbir iştirakçılarını Ramazan bayramı münasibətilə təbrik edib, tutulan orucların və edilən duaların qəbul olunmasını diləyib. Eyni zamanda, ölkəmizə sülh, əmin-amanlıq və rifah arzu edib.
Tədbir iştirakçıları bu cür tədbirlərin insanları daha da yaxınlaşdırdığını və birlik hissini gücləndirdiyini qeyd edərək, təşkilatçılara təşəkkürlərini bildiriblər. Axşam boyunca iştirakçılar bir-biri ilə səmimi söhbətlər edərək, iftar süfrəsinin gözəl anlarını bölüşüblər.
Belə tədbirlər insanların bir-birinə dəstək olmasını, həmrəyliyi və paylaşmağı təşviq edir, eyni zamanda işçi kollektivləri arasında dostluq münasibətlərini daha da möhkəmləndirir. “Aztəsərrüfat” MMC və “Yolüstü YRM” MMC -nin gələcəkdə də bu cür xeyirxah təşəbbüslərə imza atacağı gözlənilir.
