Salyan rayonunda Novruz bayramı münasibətilə möhtəşəm tədbir keçirilib. Bayram şənliyində Salyan Rayon İcra Hakimiyyətinin başçısı Rüstəm Xəlilov, Dövlət Agentliyinin sədri Ülvi Mehdiyev, hüquq-mühafizə orqanlarının əməkdaşları, eləcə də ətraf rayonlardan gələn qonaqlar iştirak ediblər.
Tədbir çərçivəsində milli adət-ənənələrə uyğun müxtəlif bayram proqramları təşkil olunub. Rəngarəng musiqi nömrələri, xalq oyunları və baharın gəlişini simvolizə edən Novruz personajları – Kosa və Keçəl iştirakçıların bayrama olan sevincini daha da artırıb.
Salyan rayonunda keçirilən Novruz bayramı tədbirində "Yolüstü" ailəvi restoranı da özünəməxsus iştirakı ilə seçilib. Restoranın peşəkar aşpazları bayram sərgisində qonaqlar üçün milli mətbəximizin ən ləziz təamlarını təqdim ediblər.
Bayram süfrəsində xüsusi dadı və zənginliyi ilə seçilən plov çeşidləri, ləzzətli kabab növləri, dadlı balıq yeməkləri və müxtəlif şirniyyatlar qonaqların zövqünü oxşayıb. Restoran ustalarının sevgi və peşəkarlıqla hazırladığı şəkərbura, paxlava, şorqoğal və digər Novruz şirniyyatları tədbir iştirakçıları tərəfindən böyük maraqla qarşılanıb.
"Yolüstü" restoranının təqdim etdiyi ləzzətli təamlar bayram tədbirinin unudulmaz anlarına çevrilib. Qonaqlar restoran kollektivinə minnətdarlıq bildirərək, keyfiyyətli və zəngin süfrəyə görə yüksək qiymət veriblər.
Bu təqdimat "Yolüstü" ailəvi restoranının milli mətbəx dəyərlərinə olan bağlılığını və müştərilərinə daim keyfiyyətli xidmət göstərmək prinsipini bir daha sübut etdi.
Novruz bayramı tədbiri Salyan rayonunda birliyin, həmrəyliyin və milli dəyərlərin təbliği baxımından xüsusi əhəmiyyət kəsb edib. Qonaqlar sonda bayram şənliyinin yüksək səviyyədə təşkil olunduğunu bildirərək təşkilatçılara minnətdarlıqlarını ifadə ediblər.
Novruzun bolluq, ruzi-bərəkət və xoş günlər gətirməsi arzusu ilə tədbir xoş anlarla başa çatıb.
