Balıq istehsalı dünyada və Azərbaycanda qida sənayesinin vacib sahələrindən biridir. Bu sektor təbii balıqçılıq və nohur balığı yetişdirilməsi kimi iki əsas istiqamətdə inkişaf edir. Nohur balığı xüsusi su hövzələrində balıqların yetişdirilməsi prosesidir. Bu üsul daha davamlı və ekoloji baxımdan daha təhlükəsizdir. Dünyada balıq istehsalının 50%-dən çoxu bu üsulla həyata keçirilir.
Azərbaycanda balıq istehsalı Xəzər dənizi və daxili su hövzələrində təbii balıqçılıq yolu ilə aparılır. Süni göllərdə və akvakultura təsərrüfatlarında balıq yetişdirilir. Salyan rayonu Azərbaycanın ən iri balıqçılıq bölgələrindən biridir. Burada balıqçılıq təsərrüfatları uzun illərdir fəaliyyət göstərir və bu sahə rayonun iqtisadiyyatında mühüm rol oynayır. Salyanda balıqçılıq əsasən nohur (gölməçə) balıqçılığından ibarətdir. Bu təsərrüfatlarda müxtəlif balıq növləri yetişdirilir və hər il müəyyən mövsümlərdə balıq ovu həyata keçirilir.
Salyan Aqroparkı balıq yetişdirilməsi və istehsalı sahələrində bir çox uğurlu işlər və layihələr reallaşdırıb. Ərazidə səkkiz nohur yaradılaraq, 100 hektara yaxın sahə nohur balıqlarının istehsalı üçün istifadəyə verilib. Hazırda 79 hektar ərazidə əmtəəlik 60 tona yaxın balıq istehsal olunur. 30 hektar ərazidə isə körpə balıqlar yetişdirilir. Ötən illə müqayisədə bu il balıq istehsalında 50 faiz artım müşahidə olunub.
Azərbaycan Balıqçılar Birliyinin üzvü, balıqşünas, ixtioloq, fermer Vidadi Heybətov bildirib ki, balıqçılıq təsərrüfatlarının uğurlu olması bir neçə əsas amildən asılıdır. Bunlara suyun keyfiyyəti, yemləmə, mühit şəraiti, genetika və bazar tələbatı daxildir. O, balıq istehsalının əhəmiyyətini xüsusi vurğulayaraq bildirib ki, balıq zülal, Omega-3 və bir çox vacib vitaminlərlə zəngindir. Balıqçılıq sənayesi minlərlə insan üçün iş yerləri yaradır. Akvakultura balıq populyasiyasını qoruyaraq təbii ehtiyatları saxlamağa kömək edir.
Balıq məhsulları dünya bazarında yüksək tələbat görür. Balıqçılığın gələcək inkişafına gəldikdə isə, daha çox süni balıqçılıq təsərrüfatlarının yaradılması, ekoloji dayanıqlı balıq istehsal üsullarının tətbiqi, ixrac bazarlarının genişləndirilməsi və keyfiyyətli məhsul istehsalı balıqçılıq sənayesinin sürətlə inkişafına təsir göstərəcək. Balıq istehsalı həm iqtisadi, həm ekoloji, həm də sağlam qidalanma baxımından əhəmiyyətli və perspektivli bir sahədir!
